الريف المصري
احمد الليثي
يوم الخير
فى بلدنا
يوم الاربع
فى كل بيوتنا
فى الرهبه كمان فى الملقه
فى الساحه وفى الوسعايه
وفى الدواوير
الاربع دايما يوم الخير
مليان بعجين وخبيز
تصحى اماتنا من النجمه
تخبز وترق فطير
وكمان بتدس وتدفس
منطال الفول الهمر
اوالعدس فى وقيد الفرن
البلدى من تحت
يوم الاربع يوم العجنه والخبزه
يوم العيش الشمسى
فوق مقارصنا والطباعه
وفطير نشابه البيت
فوق الطبليه
العيش القمح
من زرع غيطانا
عندينا اليوم غلاية
القيضى ولاالشامى
ليها تمن غاليه قوى
بعد ما راحت عليات الارض
واتملت الدنيا بيوت
كان نفسى اشوف كل بيوتنا
لسه بتخبز زى زمان
تحدق امى الفرن ولاكانون
ويبات عيشها طرى
ليوم السوق كل خميس
كان عيد فى بلدنا
كان يوم اللحمه
قسامى او بالرطل
ومازال لليوم
لكن من غير رغفان
كنا زمان الناس تتعاير
بالعيش المصرى
عيش الطوابين
وكمان كان عيب
تبقى الطلعه فى الدوار
ولاالجبابين بالعيش البرانى
واحلى مافى بلادى
قدام بيوتنا
لما يكون مرصوص العيش
ويقرصوا فى الرغفان
ويخلوا فى القعاديه
والا المواجيركانت احلى عصيده
تاكل كل عيال البيت
كبير وصغير
غنى وفقير
والاحلى كمان
لما اماتنا تهادى الرغفان القمح
لجيران مش خابزه
رغيفين ولاتلاته
طازه قوى
لسه طالعين م الفرن
الله ع الايام
كانت ولافى الاحلام
فى الاربعاء ٢٠٢٣/١/١٨