جحا
احمد الليثي
المكان
حارة فى مصر القديمة وبعض قرى الوجه القبلى
الزمان / فى عصر المماليك
الديكور / موتيفات دوارة تظهر فى الحارة القديمة وبعض القرى والبلاد البعيدة فى رحلة جحا مع سلويت ثابت يتلائم مع كل موتيفة من موتيفات الديكور .
اللوحة الاولى
يظهر جحا ساعة مغربية فى حارة شعبية عتيقة
( ينادى ويغنى ويحكى حكايات لاولاد الحارة )
جحا : مساء الخير ياحارة العز ياحارتي
فيكى اتولد ابنى على ايدين جارتى
مساء الخير ياناس ياطيبين يا أهلى
مستفتحين بالصلاة صلاة النبي تشفى
صلاة النبى أحسن ، يا عم يا مهدى ، يا للي كلامك شهد
يا عم يا سيد سيد على قلوبنا ، مساء الخير يا حارة العز ، علمنى فيكي كل قول بيلز
شبعنى فيك فول وطعمية وبصل ، الله يديم عزها ، الله يديم سترها
نعمة الله يديمها من الزوال دايما .
راجع أغني والف على رجل
من بعد تعبي وجهلى واللف على مهلى
من البلاد والعباد أرجع الاقي الحارة عشقاني بتندهلي صباح الخير يا محروسة
( فى هذه الأثناء تفتح النوافذ والشبابيك ويتجمع أهل الحارة والاطفال فى استقبال جحا بعد ظهوره وعودته مع ظهور مقهى عسكر المماليك وعثمالين فى الحارة )
رجل عجوز /حمد الله على السلامة ياواد ياجحا
طفل / حمد الله على السلامة يا عم جحا
رجل / فينك يا راجل عودا حميدا ( يقرأ فى جريدة على مقهى )
شاب / فينك ياراجل طولت علينا الغيبة المرآ دى قوي
جحا / يبتسم ويرد التحية وهو يقلب فى جرابه )
إمراة ( من النافذة ) وشك ولا وش القمر يا جحا يا منيل على عينك
طفلة / وحشتنا أقوى يا عم جحا
إمراة / الحارة من غيرك ضلمه والله
شاب / هليت يا عم جحا وهلت بشاير رمضان
رجل / هلت بالخير ويحلى السهر معاك يا جحا
طفل / وحشتنا غناويك وحكاويك يا جحا
الجميع / أى والله وحشتنا غناويك وحكاويك يا جحا
جحا ( يغنى وهو يوزع ملابس الشخصيات والماسكات من الجراب الذى يحمله على أولاد الحارة كبار وصغار مع بعض الهدايا واللعب للاطفال )
جحا يغنى مع الاطفال
حلاوة زمان
عروسة وحصان
لبنت الامير
وابن الغفير
عساكر سهارى
ما بين كل حارة
وتحلى الزيارة
لبيض الامارة
عساكر كتير
بتضرب نفير
بتدى التحية
لابن الامير
حلاوة زمان
حلاوة زمان
وكان ياما كان
عروسة وحصان
ومولد ملان
كل يفن
كل يحن
لريحة زمان
ومولد يعوز
ولد ارجوز
يغنى برموز
على كل جوز
لراجل وست
لولد وبنت
وتعمل عروسة
ويعمل عريس
ولد ارجوز
يلم الفلوس
برايز كتير
ويطلع يطير
فى مولد كبير
لست الاميرة وسيدى الامير
( يرتدى الاطفال والحاضرون بعض قطع الملابس والاكسسوار اثناء الغناء )
طفل 1 : احنا حنغنى وعاك ديما يا عم جحا
طفل 2 : وهنشخص معاك ونمثل
شاب : بس بشرط عم جحا يحكينا حكاية من حكاويه
فتاة : المهم يبقى معانا لما نغنى ونبقى معاه وهو بيحكى
جحا : انتو معايا دايما ، وهنشخص مع بعض الحكاية ، كل واحد هيلعب دور
شاب : وانت هتلعب معانا طبعا
جحا : طبعا طبعا ، هنشخص مع بعض كلنا ، يلا نبدأ الحكاية
الجميع : أيوه نبدأ الحكاية
جحا : مش قبل لما تسمعوني الغنا الحلو بتاعكم
الجميع : ماشى الكلام يا عم جحا
الاطفال يغنون
يبت يابسمة قلة
يالبسه الجزمة قله
جزمتك صوف قله
دهب مرصوص قله
رصيته رص قله
محدش حس قله
حس الامير قله
بعتلى غفير قله
غفير من مصر قله
بنالى قصر قله
قصر بشباك قله
حبكه الحباك قله
قصر بنوافير قله
مليان عصافير قله
تاكل وتطير قله
اللوحة الثانية
يلتف الاطفال حول جحا
طفل / احكيلنا حكاية يا عم جحا
جحا / عايزين أيه
طفلة / حكاية زوجة الصياد
طفل / لا حكاية الخسيس والاصيل
شاب / لا حكاية الشاطر حسن
فتاة / لا حكاية العصفور والغراب
طفل / لا حكاية قليل الذوق اكله التمساح
جحا / حاضر حاضر ، حجاكم الله خيرا ان شاء الله
وتوته توته حلوة ولا ملتوتة ( يمشى )
شاب / انت هتضحك علينا وتمشى
فتاة / مش هنسيبك النهاردة
جحا / طيب اتفقوا على حكاية واحدة
الاطفال / ( يتشاورن فى حلقة )
جحا / هـ احكيليكم ايه يا ولاد
الجميع / قليل الذوق أكل التمساح
جحا / حاضر حاضر ، كان يا ما كان ولا يحلى الكلام إلا بذكر النبي عليه الصلاة والسلام
الجميع / عليه الصلاة والسلام
جحا / كان فيه راجل غنى أقوى وربنا موسعها عليه وساكن فى بيت كبير وخدم وحشم واطيان واراضى ودنيا ، وفوق كل ده وده كان عنده زوجة صبية وحلوة غاية فى الجمال سبحان من خلق وصور ، وكل ده ومش راضى بحاله
كل النعمة دى ومش راضى ( يسكت فجأة )
شاب / وبعدين حصل ايه
فتاة / ساكت ليه يا عم جحا كمل
جحا / الراجل ساب حاله وماله وزوجته وعياله وهج على راسه قال ايه عايز يشوف بخته وحظه خرج من بلده وراح لبلاد وبلاد تشيل وبلاد تحط طلع يدور على عراف يشوفله بخته ويدله على نصيبه وحظه .
( موسيقى تصويرية يتغير المنظر نخيل وسلويت بحر وموج . جحا يشخص الرجل )
الرجل ( جحا ) / ( على شاطئ النهر يسمع أصوات الموج وفجأة يسمع أصوات غريبة )
يا خفى الالطاف نجنا مما نخاف
صوت / ايه خايف
الرجل / بصراحة خايف ، خايف جدا ، وميت فى جلدى ، مين مين بيتكلم
الصوت / انتى مش عارفني
الرجل / والله العظيم ما أعرف ، يا لطيف يا لطيف انت مين انس ولا جن / ياسابل الستر يارب
الصوت / وانت يهمك ايه انس ولا جن ولا حتى عفريت ازرق
الرجل ( مقاطعا ) أنا بسأل مقصدتش حاجة عايز اعرف
الصوت / لكن انت ايه اللى جايبك هنا بدرى كده
الرجل / متضايق زهقان ومش حامل هدومى اللى عليا وعايز افك عن نفسى ومش قادر
الصوت / طيب وانت ايه اللى ناقصك
الرجل / ناقصنى كتير ، الناس حواليه سعيدة فرحانة حظها بمب بختها معدول وانا اللى بختي مايل مش عارف ليه
صوت البحر / طيب وعايز ايه دلوقتى ؟
الرجل / عايز أشوف حظي وسعدى / عايز أعيش لي يومين ، أعرف تفسي . نفسى أعرف .
صوت البحر / أنت متجوز
الرجل / متجوز
الصوت / ناقصك فلوس
الرجل / عندى فلوس كتير
الصوت / امال مالك بس
الرجل / مش عارف مالى / عيشتي غم فى غم وهم فى هم
الصوت / جاى منين
الرجل / من بلاد بعيدة قوى
الصوت / ووصلت لحد هنا ازاى ؟
الرجل / وصلت ، بلاد تشيل وبلاد تحط ، ولاد الحلال دلوني عليك
الصوت / مين اللى دللك
الرجل / دلوني على عراف ساكن فى البر التاني ، قاللولى هوه اللى حيقوللك ويدلك على بختك وحظك خدت زادى وزوادي وجيت ، عايز أعدى البر التاني بس مش لاقي لا مركب ولا باعرف أعوم
صوت البحر / طب واللى يوصلك البر التاني
الرجل / أبوس رجليه ، أديله اللى عايزه بس يوصلني للعراف واشوف سعدى واشوف بختي
( صوت موج عالى ويخرج شخص فى هيئة تمساح )
الرجل / بسم الله الرحمن الرحيم ، أعوذ بالله من الشيطان الرجيم " يستعد للهرب "
التمساح / متخفش تعالى متهربش اثبت مكانك
الرجل / يا لطيف يا لطيف
التمساح / تعالى تعالى بس متخفش
الرجل / ( يتهته ) ت ت ت تـ تمساح وبيتكلم
التمساح / انت مالك ، خليك فى مشكلتك انا هساعدك
الرجل / تساعدنى ، انت ، لا يا عم الله الغني ، هو انا مضحى بعمرى
التمساح / طاوعنى بس ، انت مش عاوز توصل للبر التانى وتروح للعراف
الرجل / عراف وانت ايه اللى عرفك مين اللى قالك
التمساح / اللى قال قال ، انت عايز توصل ولا ترجع بلدك وتروح
الرجل / لا لا عايز عايز / نفسى اوصل بفارغ الصبر
التمساح / خلاص هشيلك على ضهرى وهاوصلك البر التانى فى امان وسلام فى غمضة عين
الرجل / فى غمضة عين
التمساح / ايوه فى غمضة عين
الرجل / طاب لمؤاخذه هتاخد كام فى التوصيله دى
التمساح /انا مش عايز منك الا حاجه واحده بس
الرجل / ان كان فى مقدورى من عنيه بس عرفنى ايه هيه
التمساح / حاجه بسيطه جدا ، اول ما توصل للعراف تقوله التمساح اللى فى البر التانى عيان ومريض وعايز علاج ودوا لمرضه اللى طول ، واطمن ان حاستناك وانت راجع وحاوصلك هنا تانى
الراجل /( باطمئنان ) بس كده ، ودى حاجه بسيطه قوى غالى والطلب رخيص
التمساح / توكلنا على الله
الرجل / توكلنا على الله ( يهم بالركوب )
( مجرد ان يرفع الرجل قدمه صوت الموج كانه ينشق ، والبحر يزمجر عن طريق موسيقى تصويريه معبره )